Kinsait Khua Ah Hriamngan Tlaknak In Tualchung mi 2 Nunnak A Liam, 6 Hliamhma An Tuar + Thawngpang Dang

Nihin August 28 zaanlei suimilam 4:00 luan hrawng ah Rakhine ramkulh, Myauk U peng, Kinsait (ကင်းဆိပ်) khuachung ah hriamngan kuan a tla i, ngakchia pakhat le kum 70 tluk nu pakhat an nunnak a liam. Cu pin ah khuami pa 3 le nu 3 hliam an tuar, tiah theih a si.

SAC ralkap le Rakhine ralkap hna an i kahnak hmun ah Myauk U hrambunh SAC khah-mah-yiah 377 ralkap sakhan lei nih hriamngan an kahbawmh hna caah, hriamngan kuan lunghnih cu Kinsait(ကင်းဆိပ်) khuachung ah a puak, tiah hliamhma tuarmi a bawmtu hna Kayuna-Hlaing(ကရုဏာလှိုင်း) phu in ṭuanvo ngeitu pakhat nih a chim.

Zaanlei tiang ah Latka khua le Buyuat Mangyu(ဘူးရွက်မညိုး) khua kar ah SAC ralkap le Rakhine ralkap kahdohnak fak ngai in a chuak rih. Hliamhma tuar zong an tam, tiah theih a si.

THAWNGPANG DANG : Tamu Ah Pyusawṭhi Nih Nu Ngakchia Pakhat Cu A Sui Tumbul An Chuh

Sagaing ramṭhen, Tamu khuapi ah kum 12 tluk nu ngakchia pakhat cu nihin August 28, zinglei suimilam 10:30 hrawng ah a sui tumbul an chuh, tiah theih a si.

Cu ngakchia nu te cu Tamu in Nanphalung lei a kal ah pyusawṭhi chungtel pa 6 le nu 2 nih a sui tumbul cu hramhram in an chuh. Ngakchia nute nih cun a ṭih tuk hna caah atu tiang bia hal khawh a si rih lo, tiah tualchung mi pakhat nih a chim.

Bureau of Special Investigation Zung, Tedim Ah Puahkehnak A Chuak: Chin ramkulh, Tedim khuapi Leilum sang ummi Bureau of Special Investigation zung ah nizaan August 27, zaan suimilam 8:00 luan hrawng ah khan puahkehnak a chuak, tiah theih a si. Cu puahkehnak ruang ah pawngkam inn zong tlawmpal a rawk, tiah theih a si.

Sagaing Ramṭhen, Shwebo ah SAC Ralkap Motor Run Cu MDF Nih Bomb An Puahhnawh Hna I Ralkap 6 An Thi: Sagaing ramṭhen, Shwebo peng Sainaikuait(စိုင်နိုင်ဂွေ့) pawng ah SAC ralkap nih zulhmi motor cu MDF nih bomb kan puahhnawh hna, tiah MDF Shwebo in ṭuanvo ngeitu nih a chim.

“Sagaing in motor 3 a ra lai, tiah a hlankan in thawng kan theih caah lampi in kan bawh hna. Aa naihnak in cawlcangh awk a ṭhat lo caah a hlat deuhnak in bomb kan puahhnawh hna i, kan hlawh a tling ko,” tiah MDF in ṭuanvo ngeitu nih a chim.

August 27, chunhnu suimilam 2:45 ah padeta bomb lung 10 in kan puahhnawh hna. SAC ralkap 6 an thi i, hliamhma tuar zong an tam, tiah bomb puahnak ah aa telmi MDF chungtel pakhat nih a chim. Cu SAC ralkap hna cu Shwebo pengkomh battalion 23, Shwebo Defense Force(SBDF), Shwejuphyu pah-kah-phah le MDF-Shwebo phufonh nih an doh hna, tiah theih a si.

Be the first to comment

Leave a Reply

Your email address will not be published.


*